Ezagutu Añanako kuadrilla

Añanako kuadrilla Arabako txoko magikoetako bat da. Hamar udalerrik osatzen dute. Haran, ibai eta mendien lurralde honetan, bi eremu desberdin aurkituko dituzue: alde batetik, mendebaldeko haranak, eta, bestetik, lautada, Iruña Oka inguruan.

Euskal arima duten eta balio handiko ondare artistiko eta historikoa gordetzen duten herriek zipriztintzen dute haren izaera. Bidezidorrek eta errepideek historiaz eta kondairaz betetako eskualde honetan barna eramango zaituzte, azken txokoraino. Gustu eta adin guztietako bidaiarientzako turismo aktiboaz gozatzeko aukera izango duzue: mendi ibiliak, bizikleta, eskalada, kayak edo zaldi gaineko ibilbideak, eta abar.

Gure jendeari dagokionez, nekazaritza, abeltzaintza eta basogintzako ustiategietatik bizi gara batik bat. Gaur egun industria ere garapen faktore garrantzitsua da, eta garapen turistikoaren aldeko apustu irmoa egin da.

Añanako kuadrillan nabarmendu beharreko beste indargune bat tokiko gastronomia bikaina da. Ostalariek proposatzen duten Arabako sukaldaritza ber-bertako produktuetan eta betiko errezeten bertsio berrituetan oinarritzen da. Landa ostatuen zerrenda ere maila berekoa da, eszenaratze eta zerbitzu harrigarriekin.